Hatimaye Ommy Dimpoz Kuzindua Albamu Yake ya Kwanza
Mwanamuziki wa Tanzania Omary Nyemobo alimarufu kama Ommy Dimpoz ametangaza kuachilia rasmi albamu yake ya kwanza ya muziki.
Ili kuonyesha kwamba uzinduzi wa albamu ya kwanza ni jambo kubwa sana kwake, Ommy Dimpoz amefuta kila kitu kwenye akaunti yake ya Instagrama na kuacha matangazo ya ujio wa kazi hiyo pekee. Ameandika, “Mabibi na mabwana kwanza ningependa kuchukua nafasi hii Kumshukuru mwenyezi Mungu kwa afya na uzima Alhamdulilah. Pili kwa Furaha ya Kipekee tarehe 4 mwezi Novemba mwaka huu 2022 siku ya Ijumaa panapo uzima naenda kuandika historia mpya katika maisha yangu kwani albumu yangu ya kwanza toka nianze muziki itatoka rasmi.”
Ameendelea kueleza jina la albamu hiyo ambalo ni “Dedication” akisema haikuwa rahisi kuandaa kazi hiyo ikitizamia mapito yake lakini anakubali kwamba kila kitu kina muda wake. Alitoa shukrani kwa wote ambao wamefanikisha safari yake kama mwanamuziki wakiwemo wanaofanya kazi pamoja, familia yake, marafiki na wadau mbali mbali ambao anasema kila mmoja wao ana mchango katika maisha yake.
Amechapisha picha ya jalidi la albamu hiyo na kwenye picha hiyo anaonekana akiwa ameketi huku akiwa ameshikwa na binti ambaye uso wake umefunikwa na kofia kubwa aliyovaa. Kwenye orodha ya nyimbo Ommy ameketi na binti huyo amesimama ila sura yake bado haionekani kwa sababu ameipa kamera mgongo.
