Tulipe Marupurupu Ya Maisha Magumu, Walimu Wa Chonyi, Kilifi Walalama
Walimu katika Kaunti Ndogo ya Chonyi, Kaunti ya Kilifi wameomba Bunge la Kitaifa kuingilia kati na kuitaka Tume ya Kuajiri Walimu (TSC) kuwalipa marupurupu ya maisha magumu.
Katika ombi lililowasilishwa kwa niaba yao na Mbunge wa Kilifi Kusini Ken Chonga, walimu hao waliomba kuwa Bunge kupitia Kamati ya Malalamiko ya Umma, lishirikiane na TSC ili kuhakikisha wanalipwa marupurupu ya maisha magumu. Pia waliwataka wabunge kushirikisha TSC kwa nia ya kutangaza kaunti nzima ya Kilifi kama eneo lenye matatizo.
Waliteta kuwa licha ya vipengee vya Kifungu cha 27 cha Katiba dhidi ya ukosefu wa usawa na ubaguzi, walimu wanaofanya kazi eneo la Chonyi wamekumbana na vizingiti tangu uhuru. Walisema walimu wanalazimika kusafiri umbali mrefu bila kupata huduma za matibabu, nyumba bora, chakula, na huduma zingine za kijamii ambazo zinapatikana tu katika Mji wa Kilifi, makao makuu ya Kaunti ya Kilifi ambayo ni umbali wa kilomita 30.
“Aidha, hata ofisi za Tume ya Utumishi wa Walimu ziko katika eneo la Vipingo ambapo mwalimu kutoka Chonyi anatumia Sh1,000 kupata ofisi ya mwajiri wao,” walimu hao walisema.
Posho ya hali ngumu ilianzishwa kama motisha kwa walimu na maafisa wengine wa umma wanaofanya kazi katika maeneo ya mbali ili kufidia ukosefu wa huduma za msingi kama vile hospitali, miundombinu iliyoboreshwa, hali mbaya ya hewa na upatikanaji wa mawasiliano.
“Changamoto zilizotajwa hapo juu zimesababisha walimu wengi wanaofanya kazi katika eneo la Chonyi kutafuta uhamisho kwenda maeneo mengine yenye mazingira bora ya kufanyia kazi na kusababisha upungufu wa idadi ya walimu katika eneo hilo,” inasomeka kwa sehemu ya ombi hilo.
