MUSA ELUMIJE ISIBO LAKWE HA APE MZURI AKAMSIKIJA; NA USWI TULUMIJA HI ISIBO LETU?

Bhatubheta bhose bha Tubheta, Shombeni na Msanga mto Mzuri Apa aisiswe!
Niing’idaki mwacheiwa nezo na Mzuri.
Nabhasemba tubhikeni bhose bhala bhandu bhabho bhasobhoshwa ni Mzuri hamwe na kaa yabho Bharisanga Sowene eye mwana wakwe asobhoka hena itasi.
Mazina mangu ni Nashera wakwe Kodawa.

Kiteto chetu cha yoo kifuma hena kitamo cha ‘Kufuma’ (Kutoka) 14:15.
Izubha akambhura Musa, “Nize weohouia uingwe lughenjo? Bhura bhandu bhazike kutonga. Bhushija ISIBO lako wanga na ulilumije na ipe.
Mbombe inekughabha Bhaisraeli bheneidima kukela bhebhata ha teri iomie.”
Itasi: Apa Mzuri tujughue meso metu ma ngoroni tubhone iti tuhete nareta yetu maghazeni kake tusimaije, hena Izina lakwe Kristo Mkija wetu,
Esae.

Bhana bha Israeli bheokie ne bhandu bha kuwela tiki too bhekimengolwe Misri ni Musa ha bhuzoro bhwakwe Farao.
Bheokie bhamlughalugha Musa mtwi mtano abundika bundii. Bheokie mtano bhabhoka kutasa mitaso isiinare bhakamwibhaa Mzuri.
Musa akarunganyikiwa pada mtano akaibhaa iti ila nareta emuilimanye nayo Farao ereihete maghazeni.
Mtano Izubha akamkulusha iti adohi magheri nawe uwela bhubho kari uhete nareta yako ya ISIBO maghazeni?

Na uswi twareoke sa bhana bha Israeli. Magheri mengi tunamwibhaa Mzuri hena zia belu tukunde kuhunduka Misri ha bhuzoro.
Magheri mengi twoka na ‘manabii’ bhetu ebho bhengi bhatubajia kaa.
Nabii ekubhura iti iya wako mrekubhona niye mring’a wako kana eohokuogha. Asikuoghe too akubheka mieji kenda ha ndeni yakwe, akakuamsha mtano ukaoka mndu aze kukuogha ighosi kechee kana icheku?
Amo ‘masibo’ ma mkeleki nimo meketa bhandu bha kaa mmwe bhadaane mtano bhesitetiana.
Magheri mengi ni mitemeni kana ha malumazo metu twalumija ‘masibo’ ma mkeleki. Mbepo ja kumaza.
Kaa jetu twabhika mafingo ma bhaghanga bhakeleki, ai bhae kukinda bharing’a. Ibhyo bhyose ni kula kubangabanga sa bhana bha Israeli.

Bhakundwa tumhundukieni Mzuri. Tulumijeni masibo metu hala handu heinare. Tumalumije ha malumazo metu tumaze bhiza. Tumalumije ha miteme tuhande na tufindike bhiza.
Tumalumije ha kaa jetu haoke na lubhoro.
Lakwe Musa elilumije ha ipe na Mbombe ikakughabha na Bhaisraeli bhakakia.
Lako unelilumija hiyo?

Mvono wakwe Yesu Kristo Mkija wetu,
Na lukundo lwakwe Mzuri Apa,
Na Ulungano lwa Ngoro Mshenete,
Luoke hamwe na Uswi iki na mtano ndarasi.
ESAE.