Paul Mackenzie Ahukumiwa Miaka 200 Jela kwa Mauaji ya Watu 191 Katika Mkasa wa Shakahola
Mhubiri mwenye utata nchini Kenya, Paul Nthenge Mackenzie, amehukumiwa kifungo cha miaka 200 gerezani baada ya kupatikana na hatia ya kuhusika na mauaji ya watu 191, wakiwemo watoto 190, katika msitu wa Shakahola, Kaunti ya Kilifi.
Hukumu hiyo imetolewa Ijumaa, Novemba 6, 2026, na Mahakama Kuu ya Mombasa chini ya Jaji Diana Kavedza Mochache, aliyesema Mackenzie alikuwa na jukumu kuu katika kuanzisha na kusimamia mfumo wa mafundisho yaliyosababisha vifo vya wafuasi wake.
Mahakama ilimpa Mackenzie vifungo viwili vya miaka 100 kila kimoja, kimoja kwa mauaji yaliyotokana na njaa ya kulazimishwa na kingine kwa mauaji ya moja kwa moja yaliyohusisha vitendo kama kunyongwa na kusababisha vifo kwa kutumia nguvu.
Vifungo hivyo vitaendeshwa kwa kufuatana badala ya kutumikia kwa wakati mmoja, hivyo kufanya jumla ya adhabu yake kuwa miaka 200 gerezani.
Washitakiwa wengine 28 waliokuwa pamoja naye katika kesi hiyo pia wamehukumiwa vifungo vya kati ya miaka 10 na 160 gerezani kutokana na nafasi zao katika mauaji hayo.
Kwa mujibu wa ushahidi uliowasilishwa mahakamani, Mackenzie, ambaye alikuwa kiongozi wa kanisa la Good News International, aliwashawishi wafuasi wake kufunga kula chakula pamoja na kuwanyima watoto wao chakula kwa madai kuwa kufanya hivyo kungewasaidia kwenda mbinguni na kukutana na Yesu kabla ya mwisho wa dunia.
Mahakama ilibaini kuwa zoezi hilo lilikuwa limepangwa kwa utaratibu maalumu, likianza na watoto kabla ya kuhusisha vijana, wanawake na wanaume. Baadhi ya wafuasi waliotaka kujiondoa walizuiwa, kutishiwa na kupigwa na washirika wa mhubiri huyo.
Mackenzie alikanusha kuwalazimisha wafuasi wake kufunga hadi kufa, lakini mahakama ilikataa utetezi wake na kumtia hatiani pamoja na washitakiwa wenzake.
Mkasa huo ulianza kufichuka mwaka 2023 baada ya polisi kuanza kufukua makaburi ya halaiki katika msitu wa Shakahola kufuatia taarifa za watu kupotea. Uchunguzi uliofuata ulibaini mamia ya miili, huku jumla ya miili 448 ikiripotiwa kupatikana katika eneo hilo.
Hata hivyo, hukumu ya sasa inahusu vifo vya watu 191 pekee, huku Mackenzie akikabiliwa pia na kesi nyingine zinazohusiana na vifo vya watu wengine katika eneo tofauti.
Kesi hiyo imekuwa miongoni mwa mikasa mikubwa zaidi ya mauaji yanayohusishwa na imani kali za kidini nchini Kenya, na imeibua maswali kuhusu usimamizi wa taasisi za kidini pamoja na namna mamlaka zilivyoshughulikia malalamiko yaliyotolewa kabla ya mkasa huo kufichuliwa.
