Washukiwa 13, Wakiwemo Polisi Watatu, Wakamatwa kwa Tuhuma za Dhahabu na Fedha Bandia Nairobi
Washukiwa 13, wakiwemo maafisa watatu wa polisi waliokuwa na silaha, wamekamatwa jijini Nairobi kwa tuhuma za kuhusika katika mtandao wa dhahabu bandia na fedha bandia.
Uchunguzi ulianza baada ya maafisa wa upelelezi kubaini mienendo iliyotia shaka miongoni mwa washukiwa. Maafisa hao waliwafuatilia washukiwa kutoka Uwanja wa Ndege wa Kimataifa wa Jomo Kenyatta (JKIA) hadi eneo walilokuwa wamejificha kando ya Barabara ya Mombasa.
Operesheni hiyo ilitekelezwa na maafisa wa Idara ya Upelelezi wa Makosa ya Jinai (DCI) kutoka Kitengo cha Polisi wa Viwanja vya Ndege (KAPU), baada ya raia mmoja wa Marekani kudaiwa kushawishiwa kuja Kenya kwa ahadi ya kupata faida kubwa kupitia biashara ya dhahabu.
Miongoni mwa waliokamatwa ni maafisa watatu wa Polisi wa Utawala (AP) kutoka Kitengo cha Ulinzi wa Majengo ya Serikali (SGB). Maafisa hao wanadaiwa kutoa ulinzi wa kutumia silaha kwa mtandao huo.
Washukiwa hao wanatarajiwa kufikishwa mahakamani huku uchunguzi ukiendelea kubaini ukubwa wa mtandao huo na iwapo kuna watu wengine waliohusika.
