Tigst Assefa Kufanyiwa Upasuaji wa Dharura Baada ya Kuumia Berlin Marathon

Nyota wa mbio za marathon kutoka Ethiopia, Tigst Assefa, anatarajiwa kufanyiwa upasuaji wa dharura mjini Munich, Ujerumani, baada ya kupata jeraha la kano katika mguu wake wa kulia wakati wa dakika za mwisho za BMW Berlin Marathon.

Jeraha hilo linatarajiwa kumweka nje ya mashindano kwa angalau miezi sita, na hivyo kuvuruga juhudi zake za kuvunja rekodi ya dunia ya mbio za marathon za wanawake.

Kwa mujibu wa PuraVida Sports Africa, Assefa mwenye umri wa miaka 29 alisafirishwa kwa ndege hadi Ujerumani mara baada ya mbio za Jumapili kwa ajili ya matibabu maalumu ya mifupa. Meneja wake, Gianni Demadonna, amesema upasuaji huo utafanywa Jumatatu mjini Munich na daktari bingwa wa upasuaji wa mguu na kifundo cha mguu, Dr Johannes Gabel, kwa msaada wa Adidas.

“Kano ya mguu wa kulia imevunjika… atafanyiwa upasuaji kesho (Jumatatu) mjini Munich,” Demadonna alinukuliwa akisema.

Dr Gabel ni daktari mkuu wa Kitengo cha Upasuaji wa Mguu na Kifundo cha Mguu katika BG Unfallklinik Murnau, mojawapo ya vituo vinavyoongoza nchini Ujerumani katika matibabu ya majeraha makubwa.

Jeraha hilo lilihitimisha ghafla mbio zilizokuwa za kuvutia kwa Assefa, ambaye alionekana kuwa kwenye nafasi nzuri ya kuwania rekodi ya dunia ya Mkenya Ruth Chepngetich ya 2:09:56.

Licha ya kuumia na kulazimika kumalizia mbio akiwa anachechemea, Assefa alirekodi muda wa kuvutia wa 2:11:04, uliompa rekodi mpya ya mbio hizo za Berlin na kumaliza sekunde 68 pekee nyuma ya rekodi ya dunia.

Assefa aliweka rekodi ya dunia ya wanawake ya marathon ya 2:11:53 mjini Berlin mwaka 2023, kabla ya rekodi hiyo kuvunjwa na Chepngetich mwaka 2024.

Muda wake wa Jumapili pia unamweka Assefa miongoni mwa wanariadha watatu waliowahi kukimbia marathon ya wanawake kwa kasi zaidi, nyuma ya Chepngetich na Methiopia mwenzake Fotyen Tesfay, aliyekimbia 2:10:51 mjini Barcelona mapema mwaka huu.

Kwa sasa, Assefa anashikilia muda wa tatu na wa nne kwa kasi zaidi katika historia ya marathon ya wanawake.

Meneja wake amesema mchakato wa kupona utakuwa mrefu, huku mwanariadha huyo akitarajiwa kurejea kwenye mashindano mwaka ujao.