BHALOSHWA BHEBHIRITE NYAVU JABHO KUUME, JETU TUBHIRITA MKONO ANI?

Bhatubheta bhose Tubheta, Shombeni na Masanga mto, Mzuri aisiswe amu ni wedi pada magheri mose.
Niing’idaki mroho mboha na Mzuri.

Kiteto chetu cha Mzuri kifuma hena Kitamo chakwe Yohana – 21:2-6.”
Simioni Petro, Tomaso (ebho bhekinaitangwa maza) Nasanaeli (ula ekinafuma Kana ya Galilaya), mwana wakwe Zebedayo na bhaloshwa bhengi bheiri bhakwe Yesu, bhose bheokie hamwe.
Simioni Petro akabhura bhaghenji,
“Mi natonga jangu kureloa nguluma.”
Bhaghenji bhakambhura,
“Tutikana hamwe.”
Bhakatonga na ngalawa kake kio chose bhesigurie kindu.
Magheri zano ikwea, Yesu eimuke kibhambara cha ipe kake bhaloshwa bhakwe bhesitisibhe iti neye. Akabhabhujanya,
“Bhabwange, amba mmegura chochose?”
Bhakamtalua,
“Tusimegure kindu.”
Akabhabhura,
“Bhiriteni nyavu jenyu kuume ha ngalawa na mnegura nguluma.”
Bhakabhirita nyavu na bhakaremwa kuikweja amu igurie nguluma belu.
Itasi: Apa Mzuri tujughue masikio metu ma shighati na ngoroni tuitasime kiteto chako.

Abha bhaloshwa bhakwe Yesu bhekinaihira ndima ya kuloa magheri bhesimetorane na Yesu. Yesu ekimebhasabhure sa bhaloshwa bhakwe ebhahurie iti ebhalosha kuloa bhandu. Ibhi bhio bhitare tiki bhekimetekerane na Yesu (ekimeruke) bhakabhika ndima ya Mzuri mbai bhakabhona bhahundukie bhuloi bhwa nguluma.
Na aha niho bhunana bhuetu bhubaha bhunaoka.
Kindu hengi Simioni eshigheje esighambie magheri ekibhura bhaghenji atonga kuloa ne,
“Naremwa mandu!”
Magheri Yesu ebhabhujanye iti amba bhemegura kindu emaije.
Mzuri akakunda kukuinga, ekuinga na itasi na akasua asua.

Na uswi ndekero keengi tunakukicha twamwibhaa Mzuri na kuhunduka kisindesinde sa bha Simioni.
Ni kindu chedi tusimuibhae Mzuri amu ni ye enaghabha. Asikunda kukughabhia na ukateloa kio chose hesina kindu ugura.
Magheri atusaria akatubhura tubhirite nyavu jetu kuume ha ngalawa jetu tuketeni hubho.
Tusijibhiriteni kumoso. Tukamsikija tunegura nguluma mtano tuitalwe.

Tasiweni pada bhakundwa na Jumapili ishenete sa mshamba wa ng’onji.
Mvono wakwe Yesu Kristo Mkija wetu,
Na lukundo lwakwe Mzuri Apa,
Na Ulungano lwa Ngoro Mshenete,
Luoke hamwe na uswi, iki na mtano ndarasi.
ESAE.