KIINGWA CHAKO KILA UGHABHIWE NI MZURI IZUBHA UNAKIMAZA ZE?
Bhatubheta bhose bhala bheoho Tubheta, Shombeni na Masanga mto Mzuri Apa aisiswe amu ni wedi pada magheri mose.
Niing’idaki mwacheiwa nezo na Mzuri hamwe na kaa jenyu.
Nabhasemba tubhikeni bhala bhose bhandu bhabho bhasobhoshwa ni Mzuri hena itasi.
Kiteto chetu cha yoo kifuma hena kitamo chakwe Matayo:-25:14-15. Magheri amo kifumwa chakwe Mzuri Apa kineoka na fwana ya hubhu:
Hena mndu eokie hafuhi kutonga charo; eitange bhahiri ndima bhakwe akabhabhura bhaimukie lumazo lwakwe. Eingie kila mmwe kuringana na luidimo lwakwe; mmwe emuingie mabengele ma nunu bhiku bhisano, ungi akamuinga bhiku bhiri na ungi kiku kimwe. Ukwade akazoka.
Itasi: Mzuri Apa tujughue meso metu ma ngoroni tubhone iti kila mmwe ehete ihacha lakwe umghabhie we mwenye la kiingwa kake hengi tusimaije, twatasa hena Izina lakwe Kristo Mkija wetu,
Esae.
Kitamo kitutindia iti ula eghabhiwe bhiku bhisano ebhimazie bhikaoka bhiku ikumi. Ula wa bhiku bhiri naye akamaza bhikaoka bhiku bhine. Kake ula eingiwe kiku kimwe ye chakwe ekiforie ibhongo akakijika.
Kila mndu aha masangeni hamwe na we na mi eghabhiwe kiingwa (talanta) chakwe ni Mzuri kuringana na luidimo lwakwe.
Kibaha niiti chako unakimaza ze?
Kana utekiforie ibhongo ukakijika?
Hena bhengi bheingiwe kiingwa cha kutasa na kutasia, Kubhina, Kusekija bhandu, Kuchora, Kujenga, Kurugha, Kuchuma, Kushana, Kuima, Bhurisha, Bhurongori na bhingi belu.
Kake Kibaha ni iti,
utisibhe kiingwa chako nezo na unakimaza sabhundu Mzuri ekundie esa usireze kusokwa akaingwa ungi kanaze?
Akacha uingiwe kiingwa cha kubhina – bhina sa usikabhine wa. Usibhine na ifuti amu usokwa. Mbhinie Mzuri na bhandu bhakwe na enekuiha kuringana na bhundu wamaza.
Kila akeye chochose Mzuri ekutasie kimaze hena zia ila imuinare na ekukumbia ndekero keri.
Akacha ni Kuima – ima sa usikaime wa.
Bhadigo bhehete rebheta yabho bhenaghamba –
Mganyi achere matuni.
Mbucha ya ii rebheta ni iti usidaishe kiingwa cha mghenji amu ula ekughabhie icho chako ni reye emghabhie chakwe na ereoho eneta eghabha.
Iki bhakundwa tumazeni kila Mzuri Apa etughabhie esa atukumbie kuringana na luidimo lwetu.
Tasiweni na Jumapili yedi ishenete sa mshamba wa ng’onji na muikae na lubhoro.
Mvono wakwe Yesu Kristo Mkija wetu,
Na lukundo lwakwe Mzuri Apa na Ulungano lwa Ngoro Mshenete,
Luoke hamwe na uswi iki na mtano ndarasi.
ESAE.
