UKAMUIIA MZURI APA AKUINGE, AKUBHUJANYE ITI AKUTASIE NA KINI UMTALUA ZE?

Bhatubheta bhose bha Tubheta, Shombeni na Masanga mto Mzuri Apa aisiswe amu ni wedi pada misi yose. Niing’idaki mwacheiwa mboha na Mzuri.
Tubhikeni bhala bhose bhandu bhabho bhasobhoshwa ni Mzuri hena lubhoro lwakwe hana itasi. Tusiibhae bhulabhula kaa yakwe mghosi Kalasinga Msenge eye efuiwe ni mche wakwe.
Izina langu nimi
Nashera wakwe Kodawa.

Kiteto chetu cha yoo chakwe Mzuri kifuma hena kitamo chakwe Mshenete Isaya – 30:19-21.
Nywi bhandu mtue Jerusalem msikaie wa. Izubha ni wa lusario na mkamuiia lughenjo enebhatalua. Izubha enebhaketa mbhetie igheri lidindie pada, kake ni reye eneoka aho kubhalosha na msikamuende wa. Mkateka zia mwatonga kuume kana kumoso, mnesikia ngori yakwe ibharatere ighama,
“Zia niyo ii, iratereni.”

Itasi: Mzuri Apa wa lukundo, tuhabhuje masoji metu amu twaia pada na utubhonye zia amu twateka tukafuma ha zia jako, hena Izina lakwe Kristo Mkija wetu, Esae.

Ibhi bhiteto bhitamiwe ni Mroti Isaya sa miaka bhiku ikumi (10,000) hubhu ibhetie kake tuka bhitungungurusa nezo bhiikaa sa twamiwa yoo bhula bhundu bhyatikana na miikare yetu.
Mzuri eohotubhura iti tusikaie wa amu twaiya pada.
Magheri tuohokusara tuia mburi ya bhindu na makusaro belu, kabhe ni Mzuri mwenye eohotuinga amo maghesho (sa mtihani) kutuyoa luing’idaki lwetu.
Kabhe magheri twaroghiwa pada Mzuri Apa wa lukundo na lusario lubaha nireye eza atungole hena bhwasi bhwetu.
Tiricho ya mtambara wa (23) aghamba mwenye iti enetuchunga bhionda (ebhyo nireye mwenye etubhinyie) esa bhihoe, tuoke na lubhoro.

Ibhyo bhionda hengi ni ndima twaenda tusipata, hengi ni kuima tusifindika, kana iduka usizoriwa sa kuzoriwa.
Hengi ni mwana ukundie usimepate, hengi ni mataluo ma mtihani masikuiseja, ngea ni ‘collage’ ukundie ikuinare…..bhose Mzuri aghamba ye mwenye iti tusikaie wa amu etuhabhuja masoji metu amu twaiya pada na enetuinga kila tukundie.
Tukateka kufuma ha zia jakwe bhulabhula etuhundua ha zia yedi.

Herena na ngano ja kae tukinasoma mndu adodola kabobo zieni na ekimekajughue kijibhwa msuka ukafuma ndeni ya ako kabobo.
Ade uo msuka umbhurie mre jughua iti aghambe kimwe kila chochose ekundie na enehiriwa. Akarunganyikiwa amu ekundie bhindu belu.
Kake Izubha ula tunamtasa uswi ye esinatupimia bhila tukundie.
Iki sa akakufumia yoo akubhure iti ukundie akutasie na kini unemtalua ze?
Tasiweni pada na Jumapili yedi ishenete sa mshamba wa ng’onji.

Mvono wakwe Jesu Kristo Mkija wetu,
Na lukundo lwakwe Mzuri Apa
Na Ulungano lwa Ngoro Mshenete,
Luoke hamwe na uswi iki na mtano ndarasi.
ESAE.