Ajali ya Salama: Watu 17 Wafariki Katika Ajali Mbaya ya Barabarani
Watu 17 wamefariki dunia katika ajali ya barabarani iliyohusisha magari kadhaa eneo la Salama, Kaunti ya Makueni, kando ya Barabara Kuu ya Nairobi–Mombasa, mapema Jumamosi, Oktoba 3, 2026.
Ajali hiyo ilitokea muda mfupi baada ya saa sita usiku. Taarifa za awali zilisema lori lilipoteza mwelekeo baada ya kudaiwa kufeli kwa breki na kugonga magari kadhaa, ikiwemo matatu ya abiria 14. Hata hivyo, polisi wanaendelea na uchunguzi kubaini kikamilifu chanzo na mlolongo wa ajali hiyo.
Kanisa Katoliki limethibitisha kuwa baadhi ya waliopoteza maisha walikuwa waumini wa Kanisa Katoliki la St. Mathias Mulumba, Parokia ya Mikindani, Mombasa, waliokuwa wakielekea Subukia National Shrine, Nakuru, kwa ajili ya ibada ya Siku ya Kitaifa ya Maombi.
Askofu Mkuu wa Jimbo Kuu la Mombasa, Martin Kivuva, alithibitisha kifo cha mahujaji hao na kueleza masikitiko yake kufuatia mkasa huo.
“Tunasikitika kwa huzuni kubwa kutangaza kifo cha ghafla cha mahujaji 17 kutoka St. Mathias Mulumba, Mikindani, katika ajali iliyotokea Salama,” alisema Kivuva.
Watu wengine saba walinusurika na kupelekwa katika Hospitali ya Sultan Hamud Sub-County kwa matibabu. Ripoti za kitabibu zilisema baadhi yao baadaye walitibiwa na kuruhusiwa, huku uchunguzi ukiendelea.
Miili ya waliofariki imepelekwa katika hifadhi ya maiti ya Hospitali ya Sultan Hamud, huku polisi wakiendelea na uchunguzi kuhusu chanzo cha ajali hiyo.
