NDURERE YA TIRICHO IKABIGHWA TUNEKICHIJWA TUOHO HIYO?
Bhatubheta bha Tubheta, Shombeni na Masanga mto Mzuri Apa aisiswe amu ni wedi pada magheri mose.
Niing’idaki mroho mboha na Mzuri na kaa jenyu.
Nabhasemba tubhikeni bhala bhose ebho bhatesha bhandu bhabho ha itasi.
Tusiibhae kaa yakwe mghosi Festo Machekele na jingi jose.
Jumapili isiie mkeleki eteshie moto simu jikafwa na tukasobha kiteto.
Tushighiane na Mzuri.
Izina langu ni Nashera wakwe Kodawa.
Kiteto cha yoo kifuma’ hena kitamo chakwe Luka:17:35-37.
Nitebhabhura kididi, kio cha msi uo heneoka na bhandu bheri bheshinjie kiraro kimwe, mwezu eneonjwa na ungi eneshighwa.
Bhache bheri bheneoka bhehua mahemba hamwe, mwezu eneonjwa na ungi ashighwe. (bhome bheri bheneoka mtemeni bheima hamwe mwezu eneonjwa na ungi ashighwe”)
Kitamo chaoka mwaji iti nete mndu na mchwakwe bheshinjie kiraro kimwe, mmwe eneonjwa na ungi ashighwe.
Tukatungurusa aha ni iti mlie mma msi wa ngasu kanisani mkaghamba iti muuhana na mkundane hena bhwasi na luizirihio, mtano kifwa kibhatanye.
Kake ndurere ya tiricho ikabighwa uo mma unekelwa. Hesina nete mma uidima kutirichana na iyo ndurere ya tiricho.
Tukuyoe nezo tusikichwe tusimekuiririkanye nezo lanye bhakundwa.
Archdeacon Houghton Salehe Mwaizinga (ashinjie na Lubhoro uko handu ewaho) magheri eokie Tubheta ha ilo ikanisa la Mahoo, egharushe bhandu belu bhakagura zia ya Mzuri kubhetia ichi kiteto.
Ekinatonga ha nyumba ja kutagha mawa ma kimisii na mala ma kihetu ebhujanya bhahengi na bharenywa iswali imwe tiki,
“Yesu akaza ikiki ukundie akukiche ugurie ngwaru?” Kana, “Ukundie akukiche ukama bhisha?” Kana,
“Ukundie akukiche uhenga mawa?”
Iyo injili yakwe igharushe bhandu bha Marika mose bhakaoka bhetonga ha itasi mtano ikanisa likaizua belu.
Bhengi bhakaoka bhaghosi bha ikanisa na bhengi bharongori bha ‘Mothers’ Union.’
Kighongo cha Mahoo kigharuke na bhandu bhakasua hasihengwe mawa mtano yoo.
Iki bhakundwa, we hamwe na mi magheri ndurere ya tiricho yabighwa tunekichijwa tuoho hio?
Tuneonjwa kana tuneshighwa?
Ni baa tunekichijwa kana ni marioko ma chang’aa?
Tunekichijwa tubighanisha bhandu kana tuketa bhandu bhaarehiane haoke na lubhoro?
Ikaoka ni msi wa Jumapili, tunekichwa tuhira
limana jetu kana tukinekchwa tutasa hamwezu na bhaghenji?
Tunekichijwa tubigha bhana bha bhaghenji ebho tunabhaitanga bhache bhetu kana tunekichijwa tuseka tuizirihiwe na bho?
Tunetikwa bhose kana mwezu enetikwa na mwezu ashighwe?
Tasiweni pada na Jumapili yedi, ibandie na ishenete sa mshamba wa ng’onji.
Mvono wakwe Jesu Kristo Mkija wetu,
Na lukundo lwakwe Mzuri Apa,
Na ulungano lwa Ngoro Mshenete,
Luoke hamwezu na Uswi iki na mtano ndarasi,
ESAE.
