Nahodha wa Argentina, Lionel Messi, amefunguka kuhusu picha maarufu iliyopigwa mwaka 2007 akiwa amembeba na kumuosha Lamine Yamal alipokuwa mtoto mchanga, akisema ni moja ya matukio ya kushangaza zaidi kuwahi kutokea katika maisha yake ya soka.
Akizungumza kuelekea fainali ya Kombe la Dunia kati ya Argentina na Hispania, Messi alisema ni vigumu kuamini kwamba baada ya karibu miaka 20 tangu picha hiyo ipigwe, yeye na Yamal sasa wanakutana kama wapinzani kwenye jukwaa kubwa zaidi la soka duniani.
“Ni picha ya ajabu sana. Nilipiga picha naye alipokuwa bado mtoto, na sasa tunakutana kwenye fainali ya Kombe la Dunia. Maisha yamejaa mambo ya kushangaza,” alisema Messi.
Messi pia hakusita kumwaga sifa kwa nyota huyo wa Hispania na Barcelona, akimtaja kuwa miongoni mwa wachezaji bora zaidi duniani licha ya umri wake mdogo wa miaka 19.
“Lamine ni mchezaji wa kipekee. Namfuatilia kwa karibu kwa sababu anachezea klabu ninayoipenda sana, Barcelona. Bila shaka tayari ni mmoja wa wachezaji bora duniani. Bado ana miaka mingi mbele yake na ana nafasi kubwa ya kuandika historia,” alisema.
Hata hivyo, Messi alisisitiza kuwa urafiki na heshima aliyonayo kwa Yamal vitawekwa kando kwa dakika 90 za mchezo, huku akiahidi Argentina itafanya kila liwezalo kuzuia nyota huyo kuonyesha kiwango chake bora.
“Kutoka upande wetu, tutafanya kila tuwezalo kumzuia asionyeshe kiwango chake bora, ingawa kufanya hivyo si rahisi. Lakini nje ya uwanja, ninamtakia kila la kheri katika maisha na kazi yake,” aliongeza.
Picha ya Messi akiwa na Yamal ilipigwa mwaka 2007 wakati wa kampeni ya hisani ya UNICEF na Barcelona, muda mrefu kabla ya yeyote kufahamu kuwa mtoto huyo angekuja kuwa mmoja wa vipaji vikubwa zaidi katika soka la dunia. Picha hiyo imekuwa ikisambaa kwa kasi mitandaoni huku wengi wakiiita ishara ya kukabidhiana kijiti kati ya kizazi cha Messi na kizazi kipya kinachoongozwa na Yamal.
