Infantino Afungua Mlango wa Kombe la Dunia la Timu 64 Mwaka 2030
Rais wa Shirikisho la Soka Duniani (FIFA), Gianni Infantino, amesema pendekezo la kuongeza idadi ya timu zitakazoshiriki Kombe la Dunia la mwaka 2030 kutoka 48 hadi 64 litajadiliwa rasmi baada ya kumalizika kwa Kombe la Dunia la 2026.
Akizungumza na vyombo vya habari vya Uswisi, Infantino alisema mafanikio ya mfumo mpya wa timu 48 katika Kombe la Dunia la 2026 yameonyesha kuwa mataifa mengi zaidi yana uwezo wa kushindana katika kiwango cha juu, hivyo kuna hoja ya kuendelea kupanua mashindano hayo.
Endapo pendekezo hilo litapitishwa, Kombe la Dunia la 2030 litakuwa na timu 64, likiwa na makundi 16 yenye timu nne kila moja, huku timu mbili bora kutoka kila kundi zikifuzu hatua ya 32 bora. Mfumo huo ungeongeza idadi ya mechi hadi 128, kutoka mechi 104 zinazochezwa katika toleo la 2026.
Infantino amesisitiza kuwa lengo la FIFA ni kuhakikisha mataifa mengi zaidi yanapata nafasi ya kushiriki mashindano hayo makubwa duniani na kuhamasisha maendeleo ya soka katika nchi ndogo.
“Kombe la Dunia linapaswa kuwa la dunia nzima, si la Ulaya na Amerika Kusini pekee. Kila taifa linapaswa kuwa na ndoto ya kushiriki,” alisema Infantino.
Hata hivyo, pendekezo hilo limeendelea kuzua mjadala mkubwa. Wapo wanaounga mkono wakisema litatoa nafasi kwa mataifa mengi zaidi, huku wakosoaji wakihofia kuwa kupanua mashindano kutapunguza ushindani na kuongeza mzigo wa ratiba ya soka duniani.
Kombe la Dunia la 2030 litafanyika nchini Morocco, Hispania na Ureno, huku mechi za ufunguzi za maadhimisho ya miaka 100 ya mashindano hayo zikichezwa Uruguay, Argentina na Paraguay.
