Kenya Airways Yarudisha Boeing 777-300ER, Yalenga Kuimarisha Safari za Kimataifa
Shirika la Ndege la Kenya Airways (KQ) limetangaza kurejesha rasmi ndege yake aina ya Boeing 777-300ER katika huduma, hatua inayotajwa kuwa sehemu ya mkakati wa kuimarisha safari za kimataifa na kuongeza uwezo wa usafiri wa abiria.
Kaimu Mkurugenzi Mkuu wa Kenya Airways, George Kamal, amesema kurejea kwa ndege hiyo ni hatua muhimu katika safari ya shirika hilo ya kujiimarisha baada ya miaka kadhaa ya changamoto za kifedha.
“Hii si tu kurejea kwa ndege, bali ni ishara ya uthabiti, matarajio makubwa na maendeleo ambayo Kenya Airways inaendelea kuyafanya kama shirika la taifa,” alisema Kamal.
Kabla ya kurejea kwenye safari za masafa marefu, Boeing 777-300ER itaanza kuhudumu katika njia ya Nairobi–Mombasa, hatua inayolenga kuwapa Wakenya nafasi ya kuisafiria moja ya ndege kubwa zaidi katika meli ya Kenya Airways. Shirika hilo pia limetangaza punguzo la hadi asilimia 50 kwa baadhi ya safari za njia hiyo ikiwa ni sehemu ya maandalizi ya maadhimisho ya miaka 50 tangu kuanzishwa kwake.
Baada ya huduma za ndani, ndege hiyo inatarajiwa kuanza rasmi safari za Nairobi–London Heathrow kuanzia Julai 17, hatua ambayo Kenya Airways inasema itaimarisha mtandao wake wa kimataifa na kuongeza uwezo wa kuhudumia abiria na mizigo kwenye njia muhimu za kimataifa.
Boeing 777-300ER ilikuwa imeondolewa kwenye huduma za Kenya Airways mwaka 2016 na kukodishwa kwa Turkish Airlines kama sehemu ya mpango wa shirika hilo wa kurekebisha hali yake ya kifedha. Kurejea kwake sasa kunachukuliwa kuwa ishara ya kuimarika kwa Kenya Airways huku ikijiandaa kupanua huduma zake na kuimarisha nafasi yake kama moja ya mashirika makubwa ya ndege barani Afrika.
