KURINDA TERI, MIFURO NA BHITITO, BHITAMIWE HA KITAMO CHAKWE MZURI TOO KIRAMKU CHAKWE ADAMU.

Bhatubheta bhose Mzuri aisiswe amu ni wedi pada magheri mose.
Niing’idaki mwabhuka mboha na Mzuri.
Izina langu ni mi Nashera wakwe Kodawa.
Kiteto cha yoo kifuma ha kitamo cha Kubhoka.
(‘Genesis’) 2:15;18.
15 Ade Mzuri akambhika uwo mndu ha mteme wa Edeni esa auime na aurinde.

18. Ukwade Mzuri akaghamba, “Esi chedi uu mndu aikae mwenye. Nilunga mghenji wakwe wedi, eye enemghenja.”
    Itasi: Apa Mzuri mlunga wanga na si tujughue meso metu ma shighati na ngoroni tubhone na kuitumoki iti utuingie teri esa tuiime na tuirinde, hena izina lakwe Kristo Mkija wetu,
    Esae.

Kitamo chakwe Mzuri hena Kubhoka lughwi lwa keeri (2) lwose luoho mwaji iti Mzuri emuingie Adamu teri aime na airinde.
Na Mzuri akamlungia Adamu mghenji wakwe wedi, ye Hawa, esa bhaghenjanye.
Mtambara wa (10-14) ughamba iti iyo teri eyo Adam esamiwe ni Mzuri yeena mifuro mine eyo mazina makwe ne Pishoni, Gihoni, Hidekeli na Frati.
Magheri amo Mzuri eokie alunga bhindu bhingi hamwe na mifuro, miti, madeghe, nyamao na Izubha akambhonya Adamu bhila ebhyo eidima kula na bhila esiidima kula.
Tusiibhae bhulabhula iti Mzuri euhie teri na mbombe akamlunga Adamu hena fwana yakwe.
Uo ne mma mbaha pada ghati yakwe Adamu na Mzuri.
Hena lwa bhubho Mzuri eena luing’idaki lubaha pada iti Adam enemsikija pada na eneima na eneirinda iyo teri, mifuro na bhitito na bhyose ebhyo bhibhikiwe si yakwe sabhundu bhetemiane.
Icho nicho Kiramku cha Isanga na Masanga.

Iki Adam na Hawa wa yoo ni uswi bhose. Mi hamwe na we. Tukubhujanye iti tuohotuhira bhula bhundu Apa Mzuri Apa na adam bhetemiane?
Tunaima na kurinda ila teri tusamiwe ni Mzuri?
Tunairinda iyo teri, mifuro hamwe na bhitito?
Teri, miti, malunyonyo, na mifuro nijo moo ja bhandu amu hesina ibhi bhindu hesina kijo na hesina bhandu.
Tukaremwa kurinda ibhi bhindu basi tuoka twakela ula mma ewo Adamu bhelie na Mzuri Apa.
Amu Izubha ne iyo teri na mbombe euhie akamlunga Adam hena fwana yakwe.
Kake kuirinda nezo iyo teri bhulabhula ni hamwe na kuhanda miti na kuirera esa iehe nezo.
Nyerere eghambie iti ukatema mti m’mwe uhande mitatu.
Magheri tugusha miti tuibaje mbao na kushota makaa na tusihande ingi ni kurongoriwa ni ndeni na ni kinyamaro kibaha pada.
Hena lwa hubho bhakundwa, magheri tuchila na kutungurusa bhindu bhya teri tumanye iti ni kindu cha kiramku na esi kindu cha kigheni na tuoke mwaji na bhulabhula tusioke na fole yoyose.
Ni kiramku chetu na nete Mzuri Apa emaije amu ni ye etusamie.
Uwo m’ma ewo euhie teri na mbombe akamlunga Adamu hena fwana yakwe wuoho bhulabhula hena dumu yetu.
Ichi nicho Kitamo chakwe Mzuri Apa.
Tasiweni pada na Jumapili yedi ishenete sa mshamba wa ng’onji.

Mvono wakwe Mzuri Apa Mkija wetu,
Na lukundo lwakwe Mzuri Apa,
Na ulungano lwa Ngoro Mshenete,
Luoke hamwe na Uswi bhose iki na mtano ndarasi,
Esae.