SRAEL: RAIS HERZOG AMKABIDHI GADI EISENKOT JUKUMU LA KUUNDA SERIKALI MPYA
Rais wa Israel, Isaac Herzog, amemkabidhi kiongozi wa chama cha Yashar na aliyekuwa mkuu wa jeshi la nchi hiyo, Gadi Eisenkot, jukumu la kuunda serikali mpya ya muungano kufuatia uchaguzi mkuu ulioacha vyama vya kisiasa bila idadi ya kutosha ya viti kuunda serikali.
Eisenkot amepewa siku 28 kukamilisha mazungumzo na kupata uungwaji mkono wa wabunge, huku akiruhusiwa kuomba nyongeza ya siku 14 iwapo atahitaji muda zaidi.
Uamuzi huo umefikiwa baada ya mashauriano ya Rais Herzog na vyama vilivyopata uwakilishi katika Bunge la Israel, Knesset, ambapo wabunge 67 walimuunga mkono Eisenkot kupewa jukumu hilo, ikilinganishwa na wabunge 46 waliomuunga mkono Waziri Mkuu wa sasa, Benjamin Netanyahu. Wabunge wengine saba hawakupendekeza mgombea yeyote.
Matokeo ya uchaguzi uliofanyika Oktoba 27 yalionyesha kuwa kambi ya Netanyahu ilipata viti 53 kati ya 120 vya Knesset, huku muungano wa vyama vinavyomuunga mkono Eisenkot ukipata viti 48.
Vyama viwili vinavyowakilisha Waarabu vilipata jumla ya viti 19, na hivyo kuwa sehemu muhimu katika hesabu za kisiasa za kuunda serikali mpya. Hata hivyo, uungwaji mkono wao kwa Eisenkot katika mashauriano ya rais hauimaanishi moja kwa moja kuwa vitashiriki katika serikali yake.
Changamoto kubwa inayomkabili Eisenkot ni kuunganisha vyama vyenye misimamo tofauti na kupata wabunge wasiopungua 61 ili kuhakikisha serikali yake inapata uungwaji mkono unaohitajika bungeni.
Akizungumza baada ya kukabidhiwa jukumu hilo, Eisenkot amesema Israel inahitaji serikali ya dharura ya kitaifa na kuahidi kufanya kila juhudi kuhakikisha anafanikiwa kuunda serikali mpya.
Kwa mujibu wa sheria za Israel, rais ana mamlaka ya kumteua mbunge anayemwona kuwa na nafasi ya kupata uungwaji mkono wa kutosha kuunda serikali, hata kama chama chake hakikushinda idadi kubwa zaidi ya viti katika uchaguzi.
Iwapo Eisenkot atashindwa kukamilisha jukumu hilo ndani ya muda aliopewa, Rais Herzog anaweza kumteua mbunge mwingine kujaribu kuunda serikali, huku Netanyahu akiwa miongoni mwa wanaoweza kupewa nafasi hiyo.
Kwa sasa, serikali ya Netanyahu itaendelea kuhudumu kama serikali ya mpito hadi serikali mpya itakapoundwa na kupata uungwaji mkono wa Bunge.
