Bill Gates Aonya AI Inaweza Kusababisha Vifo vya Bilioni Moja, Aitaka Serikali Kuweka Udhibiti
Mwanzilishi mwenza wa Microsoft, Bill Gates, ametoa wito kwa serikali ya Marekani kuweka kanuni na mifumo madhubuti ya uangalizi wa teknolojia ya akili mnemba (AI), akionya kuwa matumizi mabaya ya teknolojia hiyo yanaweza kusababisha madhara makubwa kwa binadamu.
Akizungumza katika kipindi cha NBC Meet the Press na mtangazaji Kristen Welker, Gates alisema kampuni za teknolojia haziwezi kuachwa zijisimamie zenyewe katika suala la usalama wa AI. Alisema serikali na vyombo vya sheria vinapaswa kushiriki katika kuweka mahitaji ya usalama, ufuatiliaji na mifumo ya kuzuia matumizi hatari ya teknolojia hiyo.
Gates alionya kuwa AI ikiwa mikononi mwa watu wenye nia ya kudhuru inaweza kutumiwa kuchochea matukio yenye madhara makubwa. Alisema teknolojia hiyo ina uwezo wa kuhusishwa na matukio yanayoweza kusababisha vifo vya hadi watu bilioni moja.
Kwa Gates, kuweka tu mfumo wa kuzima AI iwapo itakuwa hatari hakutoshi. Badala yake, anasisitiza kuwepo kwa ulinzi na ufuatiliaji wa lazima wakati kampuni zikiendelea kuendeleza teknolojia hiyo.
Onyo hilo linakuja wakati mjadala kuhusu usalama na udhibiti wa AI ukiendelea nchini Marekani na kimataifa, huku baadhi ya viongozi wa kampuni za teknolojia pia wakitoa wito wa kuweka viwango na mifumo ya usalama ili maendeleo ya AI yaendane na uwezo wa binadamu wa kuisimamia.
Gates pia amesema anaona changamoto ya kuweka makubaliano ya kimataifa kuhusu udhibiti wa AI kuwa kubwa, akilinganisha suala hilo na changamoto zilizowahi kuonekana katika mazungumzo ya kudhibiti silaha za nyuklia.
