TUSIGHABHE NG’OKI SA BHIANDA ITI HENA YEDI NA MBIBHI.

Bhatubheta bha Tubheta, Shombeni na Masanga mto Mzuri Apa aisiswe amu ni wedi pada magheri mose.
Niing’idaki mwabhushwa mboha na Mzuri hamwe na kaa jenyu.
Nabhasemba tubhikeni bhala bhose ebho bhatesha bhandu bhabho ha itasi.
Tusiibhae kaa ya ula m’bwange mdongo bodaboda hamwe na bhaghenji bhakwe bhose.
Izina langu ni Nashera wakwe Kodawa.
Kiteto chetu cha yoo kifuma’ hena kitamo chakwe Mshenete
Matayo – 7:3-4.
Amu ni kini uyoa kibasi cheo ha ijiso la mghenji kake usibhona igondi leoho ha ijiso lako?
Ukaria ze kumbhura mghenji,
“Nakusemba nikungole kibasi cheoho ha ijiso lako,” magheri uhete igondi leoho ha ijiso lako?
Itasi: Apa Mzuri mlunga wanga na si twakusemba utujughue meso ma ndeni tubhone iti ng’oki jose ni ng’oki na hesinsa ila iinare na ingi isiinare, hena izina lakwe Kristo Mkija wetu.
Esae.
Magheri Izubha Apa Mzuri ekingola maaghanyo makwe ikumi (ten commandments)
emangolie mose hamwe kiringanane (full package)
Kitamo kighamba iti ukabaa iaghanyo lolose wahira ng’oki.
Kitamo yoo cheoho tutindia iti uswi tunajighabha ijo ng’oki bhianda bhianda.
Iti yangu iinare kukela ya mghenji.
Icho nicho kibasi na igondi.
Sa bhuengeji. Bhandu bheengi nete na bhala bharongori bha makanisa bhengi bhenairangara pada sa ete iti bhuengeji niyo ng’oki mbaha kukela jose.
Inarangwa pada kandu kesitarika.
Tuoho tubhona iti ng’oki jingi nijo mbibhi na jingi ni jedi tiki kuhirwa.
Kididi ni iti hena ng’oki jinahirwa naiwang’ (mwaji) na jingi ha mbiso na jingi bhulabhula jinahirwa ngoroni ejo ni mrehira na Izubha ejimaije.
Kandu keengi bhandu echo esi ndima yabho, bhenarangara jila jinahirwa mwaji tiki.
Kitamo chatutindia iti tukaketa hubho tutoho tuhukumu na iyo esi ndima yetu ni yakwe Mzuri.
Kitamo chakwe Mzuri cheoho mwaji iti tusikumbie kana kuduhua chochose hena bhutami bhwakwe.
Kitamo chaghamba iti bhula bhundu tunehukumu bhaghenji na uswi Mzuri enetumia kianda ere icho icho kutuhukumu na uswi.
Iki bhakundwa tukutunguruse uswi bhenye ngoroni tuhireni bhila bhiinare tiki msongorana hakwe Mzuri.
Tusirongie bhengi kichaa iti ni bhang’oki kukela uswi bhenye.
Tutasianeni amu iki charo aha masangeni ni kieza na kidindie pada.
Tasiweni pada na Jumapili yedi ishenete sa mshamba wa ng’onji.🙏🏿
Mvono wakwe Jesu Kristo Mkija wetu,
Na lukundo lwakwe Mzuri Apa,
Na ulungano lwa Ngoro Mshenete,
Muoke hamwe na Uswi,
Iki na mtano ndarasi.
ESAE.🙏🏿