LUING’IDAKI LWAKO NILWO NGUJO NA MSHIGHI M’BAHA WA KUUHIA ITASI LAKO.
Bhatubheta bhose bha Tubheta, Shombeni na Masanga mto Mzuri Apa aisiswe amu ni wedi pada magheri mose.
Niing’idaki mwabhuka mboha na Mzuri.
Tubhikeni ha itasi kaa jose ejo bhashighwa ni bhakundwa bhabho na tusiibhae kaa yakwe Samwel Mesanai Mnene hamwe na luzungu lwakwe lwose hena kushighwa ni mkundwa wabho.
Kiteto chetu cha yoo kifuma ha kitamo cha 1Bhafumwa (1Kings) – 17:13-16.
Amu hubhu nibho Mzuri, Izubha wa Israel ehoeghamba,
“Mwanje wako usikaduhuke mchu hamwe na ijagi lako lisikasie mafuta mtano magheri ye mi, Mzuri, nineete mvua.”
Ula mche eye mume wakwe eokie asobheka akatonga akarehira bhula bhundu Elija embhurie; na bhose bhakaoka na kijo kifikie bhio belu, sabhundu Mzuri bhetemiane na Elijah.
Mchu na mafuta hesina chochose echo kibhaduhukie.
Kiteto cha yoo chohochilia wanga ya luing’idaki elwo ni ngujo na mshighi wetu mb’aha pada wa kuuhia itasi kufuma hakwe Mzuri.
Mzuri esinabundika kughabha too.
Ni bhandu abho ghati yetu ebho zaa yafolia isanga, ade we na mwana wako mwashighajika na kalukamba kamwe tiki na kambaria. Ade aze mgheni usimmaije akubhure,
“Sherusha ako kalukamba na ako kambaria tiki tule hamwe, amu Mzuri enekuinga madio na mambaria mefikie mtano zaa isie.”
Ikundie ngoro na luing’idaki elwo ni lubaha pada.
Hena rebheta mwezu ya Bhadigo inaghamba,
‘Mganyi achere matuni.’ Ni sa kughamba iti Mzuri ereohoneta kughabhia bhandu bhakwe misi yose.
Aha ni mwaji iti Mzuri Apa magheri mengi enaete ighesho kubhetia mgheni kana mndu ungi ehetwe pada, esa atisibhe luing’idaki lwetu.
Aho ha ighesho sa ilo lakwe Elijah na uo mcheku tukaketa ndambi wabhetiwa ni itasi ibaha lakwe Mzuri.
Nicho hena Kitamo chakwe Mzuri eghambie iti nizie nihetwe ni zaa, ukaniima kijo, nihete ngiru, ukaniima mbombe na nisidokie suke ukaniima suke.
Esi Mzuri mwenye ezie kake ezie hena fwana ya mndu ungi.
Iki bhakundwa, tuyoeni iki kiteto hena bhundeni ade tukutunguruse uswi bhenye ngoroni hetu iti tuimukie hio hena kuora kana kughenja ndima na bhandu bhakwe Mzuri magheri Mzuri atutasia kukela bhengi.
Tukaketa sabhundu ula mcheku eketie, Mzuri enetukumbia na tusikaduhukiwe ndarasi.
Mchu na mafuta metu mesikatuduhukie ndarasi.
Haikeni pada na mtasiwe pada na Jumapili yedi ishenete magheri tukumbiwa ni Mzuri mtano tusiduhukiwe ndarasi.🙏🏿
Mvono wakwe Yesu Kristo Mkija wetu,
Na lukundo lwakwe Mzuri Apa,
Na ulungano lwa Ngoro Mshenete,
Luoke hamwe na Uswi bhose iki na mtano ndarasi,
ESAE.
