BHUMWE NA LUBHORO.
KUHIRIANA KIKUYA, KULIANA NDALA, NA KUHIRA SHOKOA NE KUBHONYA ITI BHANDU BHEKINAIKAA NA LUKUNDO, BHUMWE NA LUBHORO. CHATAMWA NI BHAKUO NASHERA
Bhatubheta bhose bhala bheoho Tubheta, Shombeni na Masanga mto Mzuri Apa aisiswe amu ni wedi pada magheri mose.
Niing’idaki mwacheiwa nezo na Mzuri hamwe na kaa jenyu.
Nabhasemba tubhikeni bhala bhose bhandu bhabho bhasobhoshwa ni Mzuri hena itasi.
Tusiibhae kaa yakwe Herbert Ngisiang’e Mnene, eye amtesha mchwakwe, Mcheku Lucy Ngisiang’e.
Kiteto cha Mzuri cha yoo kifuma hena kitamo cha Malumbo (Zaburi)133:1.
Ni kindu chedi ze na cha kuiseja, hena bhandu bha Mzuri kuikaa hamwe na Lubhoro!
Itasi. Apa Mzuri tusejie Ngoro wako Mshenete esa tuidime kuikaa hamwe na Lubhoro sa bhana bhako hena izina lakwe Kristo Mkija wetu, Esae.
Handu hohose hala hena lukundo na bhumwe henaoka na Lubhoro. Na handu hakaketa Lubhoro henaiseja.
Ibhyo nibhyo bhindu mtami wa Malumbo abhiosha mshighi m’baha hena kiteto cha yoo.
Kabhe nete Mzuri Izubha akabhona tuikaa hamwe na Lubhoro enaisejwa.
Magheri uswi tukieha bhandu bhekinahiriana bhikuya, bhekinaliana ndala na kuseliana pada.
Bhabwange tukinatonga kimbotu mwala kitangu hamwe na kaa mmwe na ingi na ingi mtano mkoromijie kaa sere. Mkaibhuta mwasijikoromijia ne ngata ya msi ungi. Ubho ne bhumwe, lukundo na Lubhoro.
Bhandu bhekinahiriana bhikuya. Bhabwange, bhabora bhacheku na bhaghosi. Bhekinaimiana miteme, kujengiana nyumba na ndima jingi belu jojose jila. Bhandu bhekinaghenjanya hena bhumwe. Ulo ne lukundo.
Bhandu bhekinaora na ngoro jizerie swe. Bekinaombana kamunyu, kasukari, kamchu, kalukamba na neyo mbare bhandu bhemanyerie. Hesina mndu ekinashinjia na zaa ha kighongo asitekunde ye mwenye.
Ula asigura zia mmwe na bhaghenji ekinaliwa sebhe.
Magheri ma ngasu na bhifwa heena bhitonga na lughenjo lwa maitalisho.
Ulwo lwose ne lukundo na bhandu bhekinaikaa hamwe na Lubhoro.
Iki ulwo lukundo na Lubhoro lwa kuiseja lwatekia hi?
Misii bhandu bhezie bhakashigha kukundana, kuseliana na kughenjanya.
Mtano bhandu bha kaa mmwe misii kubhamanya iti ni kaa mmwe nire magheri kifwa chefumia.
Magheri picha jibighwa niho ubhona iti kabhe iji kaa ni mmwe!
Bhandu bhasichunganyie korona ngwa amu nire izana yaza. Lukundo na kuikaa na bhumwe bhyateka tosho.
Ni hiyo mvua ibhokie kutubighia?
Tutunguruseni iki kindu esa tuhundueni lukundo, bhumwe na Lubhoro sabhundu Mzuri Apa aghamba hena kitamo chakwe kandu kesitarika.
Iaghanyo ibaha likelie maaghanyo mose ni Lukundo.
Na mtami wa Malumbo atutindia nezo pada iti –
Ni kindu chedi ze na cha kuiseja, hena bhandu bha Mzuri kuikaa hamwe na Lubhoro!
Tasiweni pada na Jumapili yedi ishenete sa mshamba wa ng’onji.
Mvono wakwe Jesu Kristo Mkija wetu,
Na lukundo lakwe Mzuri Apa,
Na ulungano lwa Ngoro Mshenete,
Luoke hamwe na Uswi bhose iki na mtano ndarasi,
ESAE.
