ADOHI AKACHA BHANDU BHEKINATIRIANA ISANGA LIKIOKAZE?
Bhatubheta bhose bhala bheoho Tubheta, Shombeni na Masanga mto, Mzuri Apa aisiswe amu ni wedi pada misi na magheri mose.
Niing’idaki mwacheiwa mboha na Mzuri.
Nabhasemba tubhikeni bhala bhose bhandu bhabho bhasobhoshwa ni Mzuri hena lubhoro lwakwe ha itasi.
Kiteto chetu cha yoo kifuma hena kitamo chakwe
Matayo:- 5:9
Bhetasiwe bhala ebho ni bhaendi bha lubhoro, amu Mzuri enebhaitanga bhana bhakwe.
Itasi: Apa Mzuri mwenye zinya, tuizuje ngoro ya kubighanika tuenda lubhoro esa uidime kutuitanga bhana bhako hena Izina lakwe Kristo Mkija wetu, Esae.
Aha masangeni tuoho mbotu ndekero keeri. Hena bhala bhenakunda mabhoo pada na bhakaingia handu bhasitegusha gonda kana kitakita bhesinaisejwa.
Na hena bhala bhakakicha mabhoo bhenaghesha kuete lubhoro.
Bhutami bhwa Iaghano isha (Agano Jipya) bhuetiwe kuhololija bhula bhwa Iaghano la kae (Agano la Kale)
Magheri makwe Musa iaghanyo la ukanibaja ijiso langu nami nakubaja ijiso lako lena zinya pada.
Kake Yesu ekimeze eligharushe akaghamba bhandu bhashighiane esa haoke na lubhoro masangeni.
Kididi niiti hengi unasimba kana unasimbiwa amu ni bhindu bhiiri ibhyo. Kake nikubhujanye iti, mbucha yakwe mbaha unapata aho ukaihia mndu ni kini?
Lusimbo kana kulowalowa kuidima kuoka kuoho ndimeni, ha bhalatia, sukulu, kaa hako, kanisani kana hengi hohose hala. Ama ni marioko nimo bhandu bhenakundikana bhaoke na lubhoro lubaha. Iki ikaoka mose nimo mena gonda, kitakita na kuihiana nihio mndu enedindikia apate LUBHORO?
Bhandu bhakundane na bhaoke na miikare ya kushighiana esa isanga lioke na lubhoro.
Ukabhona mndu ekufwalasha, ekusuludanya, ekuchunganyia maongo, kana ekubaa ngoro, tana naye. Siteshe igheri lolose lako naye amu etekundie kukusheshija. Hengi ni kiiru ehete wanga yako. Uo ni mmondo wakwe mkeleki. Ateazerijwa hako ni mkeleki.
Mti uhete maduda medi menona niwo unabhiritiwa mbighimbighi na mano belu.
Hira bhindu bhyako sa esiwaho na unepata haika yako hakwe Mzuri.
Mtami Matayo atutindia iti tukahira hubho Izubha enetuitanga bhana bhakwe.
Oka sa Ayubu, Daudi, Yusufu kana Paulo.
Akacha Yesu mwenye bhemhirie hubho na akagumiria na akabhashighia, we niani msongorana hakwe Mzuri usihiriwe bhyose ibhyo? Amu ni kini usiidima kushighia?
Tasiweni pada na Jumapili yedi ishenete sa mshamba wa ng’onji kake Tushighiane esa haoke na Lubhoro lubaha masangeni.
Mvono wakwe Jesu Kristo Mkija wetu,
Na lukundo lwake Mzuri Apa,
Na Ulungano lwa Ngoro Mshenete,
Luoke hamwe na uswi iki na mtano ndarasi.
ESAE.
